Irailaren 6an 10. Aretxabaletako Tomate Eguna ospatuko da, tokiko gastronomia eta produktuei eskainitako jardunaldi batekin.
Aretxabaletako Tomate Egunaren edizio berri bat ospatuko da datorren irailaren 6an. Aurten 10. urteurrena beteko du hitzorduak, eta jada erreferente gisa finkatu da tokiko gastronomia, hurbileko produktuak eta lurraldeari lotutako tradizioa balorean jartzeko.
Debagoiena eskualdea eta, bereziki, Aretxabaleta, beren produktu adierazgarrienetako baten inguruan bilduko dira beste behin, herritarrei zein bisitariei tokiko produktuen aberastasuna gerturatzeko eta eskualdeko kultura gastronomikoa bizirik mantentzen dutenen lana nabarmentzeko helburua duen jardunaldi batean. Gainera, Aretxabaletako Tomate Egunak turismo gastronomikoa sendotzen du, lurraldeari lotutako esperientziak eta kalitatezko produktuak balioan jarriz. Gipuzkoa erreferentziazko turismo helmuga bilakatzen laguntzen du produktu bereziak, lurraldeari lotutako esperientziak eta kalitatean zein tokiko nortasunean oinarritutako gastronomia indartuz.
Eskualdeko eragile ezberdinen arteko lankidetzari esker, Aretxabaletako Tomate Egunaren xedea da bertako produktuak sustatzea, ekoizle eta kontsumitzaileen arteko lotura estutzea eta landa-inguruneari lotutako sukaldaritza-kulturaren garrantzia jendaurrean zabaltzea.
Egitarauak hiru ekitaldi nagusi izango ditu: Aretxabaletako Tomatearen eta Tokiko Produktuen Azoka, Aretxabaletako Tomatearen Pintxo Ibilbidea eta Euskal Herriko Autoktonoen Tomate Lehiaketaren 4. edizioa.
Gainera, edizio honetako une aipagarri eta bereziena 13:00etan izango da: Aretxabaletako eta Mendigorriko udalek lankidetza hitzarmena sinatuko dute azokaren 10. urteurrena dela eta. Akordioak bi udalerriei lotutako tomate-barietate tradizionalak sustatu eta balorean jartzea du helburu.
Egitarauari dagokionez, 10:00etatik 14:00etara bitartean, Durana kaleak Aretxabaletako Tomatearen eta Tokiko Produktuen Azoka hartuko du. Bisitariek bertako produktu sorta zabala aurkituko dute. Bertan izango da, baita ere, tomate barietate zaharren erakusketa, non laborantza honen aniztasuna eta barietate tradizionalak mantentzearen garrantzia erakutsiko den.
Egitaraua osatzeko, tomate haziak ateratzeko tailerra egongo da 11:00etan Marc Badalek gidatuta eta 12:00etan Anne Otegiren eskutik, tomatearekin sukaldatzeko tailerra eta dastaketa.
Tokiko barietateen kontserbazioan eta hedapenean interesa duten ekoizle eta zaleak biltzen dituen Euskal Herriko IV. Tomate Autoktonoaren Lehiaketako sari banaketa 13:30tan izango da, aurtengo jardunaldiari amaiera emanez.
Horrez gain, irailaren 5ean eta 6an, Aretxabaletako hainbat establezimenduk Tomatearen Pintxo Ibilbidean parte hartuko dute, produktu hau protagonista duten proposamen gastronomikoak eskainiz.
Aretxabaletako Tomate Eguna Aretxabaletako Udalak, Deba Garaia Landa Garapen Elkarteak eta Debagoieneko Mankomunitateak antolatzen dute, Eusko Jaurlaritzaren eta Gipuzkoako Foru Aldundiaren laguntzarekin.
Hamar edizio bete ondoren, hitzordu hau topagune bihurtu da tokiko gastronomia balioesteko, lurraldeko produktuak sustatzeko eta Debagoieneko turismo jasangarriari, elikadurari eta kulturari lotutako ondarea indartzeko konpromisoarekin.
Euskal Herriko IV. Tomate Autoktonoaren Lehiaketan parte hartu nahi dutenek informazio gehiago jaso dezakete edo izena eman dezakete kultura@aretxabaleta.eus posta elektronikoaren bidez edo 943 081 001 telefono zenbakira deituz.
