Aretxabaletako komertzioak bultzatzeko bonu kanpaina, Ekainaren 16an jarriko da martxan

2025/06/10
Aretxabaletako Udalak eta Aretxarte Merkatari Elkarteak elkarlanean, herriko komertzio txikiak sustatzeko bonu kanpaina berri bat jarriko dute martxan ekainaren 16an. Ekimen honen helburua argia da: herritarren kontsumoa bertako dendetan bultzatzea, erosahalmena handituz eta tokiko ekonomia indartuz.

Kanpaina honen bidez, aretxabaletarrek 30 euroko prezioan 50 euroko balioa duten bonuak eskuratu ahal izango dituzte. Horrek esan nahi du bonu-pakete bakoitzeko 20 euroko aurrezkia lortuko dela, bertako erosketetan zuzenean aplikatu ahal izateko. Bonu hauek Aretxabaletako merkataritza establezimenduetan erabili ahal izango dira, horretarako atxikitako dendetan.

Nola eskuratu bonuak eta zer eskaintzen duten?

Bonuak Arkupe Kultur Etxean jarriko dira salgai, eta Aretxarte Merkatari Elkartea arduratuko da salmenta eta kudeaketaz. Bonu-pakete edo "tira" bakoitzak honakoak izango ditu:

  • Bi bonu 5 eurokoak
  • Bi bonu 10 eurokoak
  • Bonu bakarra 20 eurokoa

Guztira, bonu-pakete bakoitzak 50 euroko balioa du. Lehen kanpaina honetan, guztira 875 bonu-pakete aterako dira salgai, hau da, 4.375 bonu indibidual jarriko dira herritarren eskura.

Aretxabaletako komertzioak bultzatzeko bonu kanpaina, Ekainaren 16an jarriko da martxan