Araba Ibilbideko bi lorategien berritzea

Hurrengo egunetan Araba Ibilbideko bi lorategi berritzeko lanak hasiko dira, 34 bis eta 36 lorategiak hain zuzen ere. Bihar bertan emango zaie hasiera lehenengo lanei.

Lehen fasean, gaur egun dauden landareak eta belarra kenduko dira. Ondoren, eremua egun batzuetan atseden uziko da, eta gero landaketa berrirako prestaketa-lanak egingo dira.

Lorategi berrietan landare bizikorrak landatuko dira. Denbora luzez bizi diren landareak dira landare bizikorrak. Beste landare askorekin alderatuta, ez dira urtero landatu behar, eta oso egokiak dira mantentze-lanak gutxitzeko eta ur-kontsumoa murrizteko. Neguan, askotan, itxuraz lehortu edo zimeldu egiten dira, baina ez dira hiltzen: udaberria iristean berriro indartzen dira, hostoak eta loreak emanez.

Horregatik, lorategi hauek lorategi biziak izango dira, urteko sasoi bakoitzean itxura desberdina izango dutenak. Neguan, landare batzuk berde mantenduko dira eta beste batzuk lehorragoak ikusiko dira; altuera eta testura ezberdinak izango dituzte, eta hori ere lorategiaren balio estetikoaren parte izango da. Udaberrian, berriz, koloreak eta loreak nagusituko dira, eta uda osoan zehar loraldiaz gozatzeko aukera izango da, udazkena iritsi arte.

Lanek iraun bitartean, langileak eremu horietan arituko dira lanean.

Ekimen honen helburua da, gainera, lorategi mota hau herriko beste gune batzuetara ere zabaltzea etorkizunean. Horien artean daude Lausita eta Araba Ibilbideko beste hainbat eremu.